जळगाव शहरात शांतिनिकेतन परिसरात घटना
जळगाव (प्रतिनिधी) :- शहरातील शांतीनिकेतन परिसरात राहणारे एक वृद्ध दांपत्य पुण्यात मुलाकडे गेल्याची संधी साधून अज्ञात चोरट्यांनी त्यांच्या बंद घरातून दागिने आणि रोकड असा एकूण १ लाख २९ हजार रुपयांचा मुद्देमाल लंपास केला. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
शांतीनिकेतन नगर येथे राहणारे शंकर रामचंद्र इंदानी (वय ६९) हे पत्नीसोबत १३ ऑगस्टपासून पुण्यात मुलाकडे गेले होते. त्यांचे घर बंद असल्याचे पाहून चोरट्यांनी डाव साधला. बुधवारी, २० ऑगस्ट रोजी सकाळी ही घटना समोर आली. चोरट्यांनी घराच्या खिडकीचे लोखंडी ग्रील वाकवून आत प्रवेश केला. त्यानंतर घरातील लाकडी कपाटातून सोन्याचे दागिने आणि रोख रक्कम असा १ लाख २९ हजार रुपयांचा ऐवज चोरून नेला. ही घटना लक्षात आल्यानंतर शंकर इंदानी यांनी गुरुवारी दि. २१ ऑगस्ट रोजी सायंकाळी ५ वाजता एमआयडीसी पोलीस ठाण्यात याबाबत फिर्याद दिली. पोलिसांनी अज्ञात चोरट्यांविरोधात गुन्हा दाखल केला आहे. या प्रकरणाचा पुढील तपास पोलीस उपनिरीक्षक चंद्रकांत धनके करत आहेत.
