जळगाव एमआयडीसी पोलिसांची कारवाई
जळगाव (प्रतिनिधी) :- शहरातील पांडे चौकातून दुचाकी चोरून नेणाऱ्या अनुराग जाधव (रा. रामेश्वर कॉलनी) याला एमआयडीसी पोलिसांनी बुधवारी २० ऑगस्ट दुपारी १२ वाजता रामेश्वर कॉलनी येथून अटक केली आहे. त्याच्याकडून चोरीची दुचाकी (एमएच १९, बीआर ८५३८) हस्तगत करण्यात आली आहे.
जळगाव शहरातील पांडे चौकातून चोरीला गेलेली दुचाकी संशयित अनुराग जाधव वापरत असल्याची गुप्त माहिती एमआयडीसी पोलिसांना मिळाली होती. या माहितीच्या आधारे पोलिसांनी बुधवारी २० ऑगस्ट रोजी दुपारी १२ वाजता तात्काळ तपास सुरू केला आणि सापळा रचला. पोलिसांच्या या जलद कारवाईमुळे चोरटा हाती लागला. एमआयडीसी पोलीस ठाण्याचे उपनिरीक्षक राहुल तायडे, सहाय्यक फौजदार विजयसिंग पाटील, पोलीस नाईक प्रदीप चौधरी आणि विशाल कोळी यांच्या पथकाने ही यशस्वी कामगिरी केली. चोरीची दुचाकी घेऊन फिरत असलेल्या संशयित अनुराग जाधव याला ताब्यात घेऊन त्याच्याकडून चोरीची दुचाकी हस्तगत करण्यात आली. या घटनेचा पुढील तपास पोलीस नाईक प्रदीप चौधरी हे करत आहेत.
