जळगावात गोलाणी मार्केट परिसरातील घटना सीसीटीव्हीमध्ये कैद
जळगाव ( प्रतिनिधी ) : – मध्यरात्रीच्या सुमारास दुचाकीवरून आलेल्या चोरट्यांनी वाहनाचे वायर तोडून जनरेटरसह ते चोरून नेले. ही घटना १४ जुलैला मध्यरात्रीच्या सुमारास गोलाणी मार्केट परिसरात घडली. ही संपूर्ण घटना सीसीटीव्ही कॅमेऱ्यात कैद झाली आहे. या प्रकरणी शहर पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
नवी पेठेतील मिलिंद मुकुंद थत्ते (वय ४३) यांचा साऊंड सिस्टीमचा व्यवसाय आहे. त्यांच्याकडे असलेले जनरेटरचे वाहन त्यांनी गोलाणी मार्केटसमोर असलेल्या मायटी ब्रदर्स नावाच्या दुकानासमोर लावलेले होते. तेथून ते चोरीला गेले आहे. पोलिसांनी परिसरातील सीसीटीव्ही कॅमेऱ्यांची तपासणी केली असता त्यात चोरीची संपूर्ण घटना कैद झाली आहे. त्यानुसार त्यांनी ते फुटेज ताब्यात घेतले असून, चोरट्यांचा शोध घेतला जात आहे.
दिनांक १४ जुलैला मध्यरात्रीच्या सुमारास एका दुचाकीवरून दोन जण त्याठिकाणी आले. दोघांमधील एक जण जनरेटर वाहनाच्या (क्र. एमएच १९ एस ०६६६) केबिनचा दरवाजा उघडून आत शिरला व वायरिंग तोडून वाहन सुरू केले आणि जनरेटरसह वाहन असा एकूण ९१ हजार रुपये किमतीचा मुद्देमाल चोरून नेला.
या प्रकरणी मिलिंद थत्ते यांच्या फिर्यादीवरून शहर पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे. पुढील तपास पोहेकॉ नंदलाल पाटील करत आहेत.
