गणवेश योजनेतून ९८ टक्के विद्यार्थिनींना गणवेशाचे वाटप

जळगाव ( प्रतिनिधी ) – दिनांक १६/७/२०२५ रोजी काही प्रसार माध्यमात गणवेश योजनेतून काही विद्यार्थी वंचित राहिल्याची बातमी प्रसिद्ध झाली होती. यासंदर्भात शिक्षण विभागाने खुलासा करत स्पष्ट केले आहे की, सध्या वितरण प्रक्रियेत कोणतीही गडबड किंवा अपूर्णता नाही. सन २०२५-२६ या शैक्षणिक वर्षासाठी मोफत गणवेश योजनेसाठी सन २०२३-२४ च्या यू डायस (U-DISE) माहितीच्या आधारे मंजूर विद्यार्थ्यांच्या संख्येनुसार गणवेश रक्कम वितरित करण्यात आली आहे.

पात्र विद्यार्थ्यांपैकी ९८% विद्यार्थ्यांना प्रत्यक्ष गणवेश देण्यात आले आहेत. शैक्षणिक वर्ष सुरू होताना लाभार्थी संख्या थोडी कमी भासली असली, तरी संख्येत हळूहळू स्थिरता येत असून तालुकास्तरावर समायोजनाची प्रक्रिया सुरू आहे. ही प्रक्रिया २५ जुलै तारखेपर्यंत पूर्ण करण्याचे निर्देश सर्व गटशिक्षणाधिकाऱ्यांना देण्यात आले असून, लवकरच १००% वितरण प्रक्रिया पूर्ण करण्यात येईल.असे प्रभारी शिक्षण अधिकारी सचिन परदेशी यांनी कळविले आहे.