चाळीसगाव तालुक्यात हातले तांडा येथील घटना
चाळीसगाव (प्रतिनिधी) :- तालुक्यातील हातले तांडा येथील १७ वर्षीय तरुणीचा दरवाजात अचानक विद्युत प्रवाह उतरल्याने विजेच्या धक्क्याने मृत्यू झाल्याची दुर्दैवी घटना दि. २५ जून रोजी सकाळी १० वाजेच्या सुमारास घडली आहे. याप्रकरणी चाळीसगाव ग्रामीण पोलीस स्टेशनला अकस्मात मृत्यूची नोंद करण्यात आली आहे.
धनश्री साईनाथ राठोड (वय १७ वर्ष रा. हातले तांडा ता. चाळीसगाव) असे मयत तरुणीचे नाव आहे. तिचे वडील साईनाथ काशिनाथ राठोड हे हातमजुरी करून परिवाराचा उदरनिर्वाह करतात. तिच्या पश्चात आई, वडील, २ भाऊ असा परिवार आहे.(केसीएन)दि. २५ जून रोजी सकाळी १० वाजेच्या सुमारास तिचे कुटुंबीय कामावर गेले होते. तर धनश्रीचा भाऊ हा बाहेर गेला असता धनश्री हि दरवाजाला कडी लावायला गेली. तेव्हा अचानक दरवाज्यात विद्युत प्रवाह आल्याने धनश्रीला विजेचा धक्का बसला आणि ती बाजूला फेकली गेली.
दरम्यान, मीटरची वायर कट झाल्यामुळे हा विद्युत प्रवाह उतरला होता अशी माहिती नातेवाईकांकडून मिळाली. दरम्यान, धनश्रीला कुटुंबीयांनी तातडीने चाळीसगाव ग्रामीण रुग्णालयात उपचारासाठी दाखल केले असता तिला वैद्यकीय अधिकाऱ्यांनी तपासून मयत घोषित केले.(केसीएन)यावेळी कुटुंबीयांनी एकच आक्रोश केला. हातमजुरी करणाऱ्या कुटुंबावर कोसळलेल्या दुःखद घटनेमुळे हातले तांडा गावावर शोककळा पसरली आहे. घटनेप्रकरणी चाळीसगाव ग्रामीण पोलीस स्टेशनला अकस्मात मृत्यूची नोंद करण्यात आली आहे.
