गुणवत्तापूर्ण सेवेबद्दल जळगाव जिल्ह्यातील ५ जणांचा सन्मान
मुंबई /जळगाव (विशेष प्रतिनिधी) :- राष्ट्रपतींनी जाहीर केलेली पोलीस शौर्य पदक, उल्लेखनीय सेवेबद्दल राष्ट्रपती पोलीस पदक तसेच गुणवत्तापूर्ण सेवेसाठी पोलीस पदक महाराष्ट्राचे राज्यपाल सी. पी. राधाकृष्णन यांच्या हस्ते राज्यातील ८३ पोलीस अधिकारी व पोलीस अंमलदारांना समारंभपूर्वक प्रदान करण्यात आले. राजभवन येथील दरबार हॉल येथे झालेल्या पदक अलंकरण सोहळ्यामध्ये २०२१ तसेच २०२२ या दोन वर्षांच्या स्वातंत्र्यदिनी जाहीर झालेली पोलीस पदके देण्यात आली.
यात ४१ पोलीस अधिकारी व जवानांना पोलीस शौर्य पदक, ३ पोलीस अधिकाऱ्यांना उल्लेखनीय सेवेबद्दल राष्ट्रपती पोलीस पदक तसेच ३९ पोलीस अधिकारी व अंमलदारांना गुणवत्तापूर्ण सेवेसाठी पोलीस पदके प्रदान करण्यात आली.पोलीस अलंकरण कार्यक्रमाला गृह राज्यमंत्री (ग्रामीण) डॉ. पंकज भोयर, पोलीस महासंचालक रश्मी शुक्ला, महासमादेशक गृहरक्षक दल रितेश कुमार, पोलीस महासंचालक, महाराष्ट्र राज्य पोलीस गृहनिर्माण व कल्याण महामंडळ अर्चना त्यागी, मुंबईचे पोलीस आयुक्त देवेन भारती यांसह पोलीस अधिकारी, सेवानिवृत्त पोलीस अधिकारी व गौरविण्यात आलेल्या पोलीस अधिकाऱ्यांचे कुटुंबीय उपस्थित होते.(केजीएन)राज्यपालांच्या हस्ते पदकाने अलंकृत पोलीस अधिकारी व अंमलदारांमध्ये गुणवत्तापूर्ण सेवेबद्दल उल्लेखनीय कार्य करणाऱ्या पोलीस कर्मचाऱ्यांमध्ये जळगाव जिल्ह्यातील प्रदीप राजाराम चिरमाडे, सुरेश पंडित पाटील हे २ उपनिरीक्षक तर माणिक सोनजी सपकाळे, प्रदीप पंढरीनाथ चांदेलकर या २ सेवानिवृत्त झालेल्या उपनिरीक्षकांचा समावेश आहे.जळगाव तालुका पोलीस ठाण्याचे तत्कालीन सहायक फौजदार व सध्या धुळे पोलीस दलात असलेले विजय देवराम पाटील यांचाही सन्मान करण्यात आला आहे.
