चोपडा शहरात कचरा वेचणाऱ्या तरुणाला पोलिसांनी केली अटक
चोपडा (प्रतिनिधी) :- कचरा वेचणाऱ्या तरुणाने त्याच्यासोबत राहणाऱ्या महिलेचे दुसऱ्या व्यक्तीसोबत अनैतिक संबंध असल्याचे संशयावरून त्याला लाकडी काठीने मारहाण केली. तसेच डोक्यात दगड घालून त्याचा निर्घृण खून केल्याची घटना शनिवार दिनांक २४ मे रोजी पहाटे उघडकीस आली आहे. याप्रकरणी चोपडा शहर पोलिसांनी गुन्हा दाखल केला असून संशयित आरोपीला अटक केली आहे.
शहरातील पं.स. सभापती निवास असणाऱ्या स्थळी एका अज्ञात इसमाचा खून झाल्याची घटना उघडकीस आली. उपविभागीय पोलिस अधिकारी अण्णासाहेब घोलप आणि पोलिस निरीक्षक मधुकर साळवे यांनी काही तासांतच आरोपीस अटक केली आहे. चोपडा शहरात कचरा गोळा करून उदरनिर्वाह करणारे दोन पुरुष व एक स्त्री हे सोबत कचरा गोळा करतात. यापैकी मृत व्यक्ती आणि सोबत असणारी ३५ वर्षीय महिला यांचे अनैतिक संबंध असल्याचा राग मनात ठेवत राजेश काशीनाथ बारेला याने मृताच्या डोक्यात दगड मारून खून केला.
हा खून अनैतिक संबंधातून झाल्याचे स्पष्ट झाले असून मयताची ओळख मात्र पटलेली नाही. तसेच जानू बारेला हिलादेखील मारहाण करून जखमी केल्याची घटना २५ रोजी पहाटे ३ वाजेच्या सुमारास घडली होती. पंचायत समितीसमोर असणाऱ्या सभापती निवासाच्या प्रांगणात एका अज्ञाताचा मृतदेह पडल्याचे पोलिसांना कळले. पोलिसांनी तपासकामी चार पथके तयार करून धरणगाव, पारोळा आदी ठिकाणी पाठवली.(केसीएन)मात्र, चार तासांत सीसीटीव्हीच्या माध्यमातून आरोपी राजेश काशीराम बारेला (३३, चाचऱ्या, ता. सेंधवा) या आरोपीस गोरगावले रोडवरून ताब्यात घेत त्याला अटक केली आहे. हा खून अनैतिक संबंधातून झाला असून, मृताची अद्याप ओळख पटली नसल्याची माहिती पोलिसांनी दिली आहे.
