जामनेर तालुक्यात फत्तेपूर येथे पोलिसांची कारवाई
जळगांव (प्रतिनिधी) :- जामनेर तालुक्यातील फत्तेपूर येथे सपोनि अंकुश जाधव यांच्या नेतृत्वाखाली मंगळवारी दि. १३ मे रोजी पहाटे ओमनी गाडीतून देशी दारूची अवैध वाहतूक करणाऱ्या इसमाला अटक करण्यात आली आहे.
फत्तेपूर शहरातील गोद्री रस्त्यावरून ओमनी (क्रमांक एमएच २८ एएन ४०९२) वाहनातून दारूची अवैध वाहतूक होत असल्याची माहिती मिळताच पो.ह. प्रवीण चौधरी, पो.कॉ. मुकेश पाटील आणि पो.कॉ. भूषण पाटील यांच्या पथकाने टी पॉईंटजवळ नाकाबंदी लावली. पहाटे ३.२० वाजताच्या सुमारास सदर वाहन थांबवून तपासणी केली असता, त्यात संशयित कमलाकर अण्णा सपकाळ (वय ३३, रा. शिवणा, ता. सिल्लोड, जि. संभाजीनगर) हा मिळून आला. त्याच्या वाहनात ५४ बॉक्स देशी दारू सापडली आहे. या बॉक्समध्ये भिंगरी देशी दारूचे ३९ बॉक्स, टंगो पंच ५ बॉक्स आणि संत्रा देशी दारूचे १० बॉक्स अशा एकूण ५४ बॉक्समध्ये अंदाजे रु. १.८२ लाखांचा दारूचा साठा आढळून आला. सदर आरोपीविरुद्ध गुन्हा दाखल करण्यात आला आहे. पुढील तपास सपोनि अंकुश जाधव करत आहेत.
