जळगावातील एम.जे. कॉलेजमागे गुलमोहर कॉलनीत घडली घटना
जळगाव (प्रतिनिधी) : येथील उच्चभ्रू वस्तीत एम.जे. कॉलेज मागील गुलमोहर कॉलनी परिसरात मीनाताई ठाकरे मार्केट येथे रात्री १० वाजता एका तरुणावर गोळीबार करण्यात आला. यामध्ये पोलिसांनी संशयित आरोपीचे नाव निष्पन्न केले असून त्याला ताब्यात घेण्याचे काम सुरू होते.
दादू उर्फ महेंद्र समाधान सपकाळे (वय २२, रा. पिंप्राळा हुडको, जळगाव) असे जखमी तरुणाचे नाव आहे. तो परिवारासह पिंप्राळा हुडको परिसरात राहतो. गुरुवारी दि. २४ एप्रिल रोजी रात्री १० वाजता तो एम. जे. कॉलेज मागील मीनाताई ठाकरे मार्केट येथे आला होता. तेथे संशयित आरोपी विशाल कोळी व इतर संशयितांनी रामनवमीला झालेल्या वादातून महेंद्र सपकाळे याच्यावर गोळीबार केला. त्यात महेंद्र यांच्या उजव्या बाजूने कमरेखाली गोळी लागली आहे. तर गोळीबार करून संशयित आरोपी फरार झाले.
घटनेची माहिती रामानंदनगर पोलीस स्टेशनला मिळताच त्यांनी घटनास्थळी धाव घेतली. तसेच स्थानिक गुन्हे अन्वेषण शाखा आणि वरिष्ठ अधिकारी घटनास्थळी दाखल झाले. यामध्ये अप्पर एसपी अशोक नखाते, डीएसपी संदीप गावित यांनी पाहणी केली. घटना स्थळाजवळ जिवंत गोळी आढळून आली आहे. दरम्यान एलसीबी फरार संशयित आरोपींचा शोध घेत असून शासकीय रुग्णालयामध्ये गर्दी पाहायला मिळाली. प्राथमिक उपचारानंतर दादू सपकाळे याला खाजगी रुग्णालयात उपचारासाठी हलवण्यात आले आहे. रामानंदनगर पोलीस स्टेशनला फिर्याद दाखल करण्याचे प्राथमिक काम सुरू होते.
जखमी व हल्लेखोर हे सराईत गुन्हेगार असल्याची माहिती अपर पोलीस अधीक्षक अशोक नखाते यांनी पत्रकारांशी बोलताना दिली.
