जळगाव ( प्रतिनिधी )
अज्ञात आरोपींनी रविवारी मध्यरात्री पेट्रोल टाकून दोन कार व दोन दुचाकी जाळल्याची घटना तीन ठिकाणी घडल्या . एक कार व एक दुचाकी जळून खाक झाली. उर्वरित दुचाकी आणि कार पेटवून दिल्याचा प्रकार सीसीटीव्हीत कैद झाला असून
रामांनदनगर पोलिसात अज्ञात आरोपी विरोधात तक्रार दाखल झाली आहे.
बॅरिस्टर ॲड. उज्ज्वल निकम यांच्या बंगल्याच्या मागे राहणारे नीरज छाजेड (३७, रा. रामदास कॉलनी ) यांच्या मालकीच्या दोन दुचाकी आहेत १ जून रोजी मध्यरात्री २ वाजेच्या सुमारास अज्ञात व्यक्तींनी अपार्टमेंटमध्ये लावलेली दुचाकी (एमएच १९ बीझेड ६१८८) मोपेड गाडीवर पेट्रोल टाकून पेटवून दिली. ती दुचाकी जळून खाक झाली बाजूला उभी असलेली टीव्हीएस मोपेड (एमएच १९ एझेड १२३७) अर्धवट जळाली. अपार्टमेंटच्या वाचमनच्या लक्षात आल्याने त्याने आरडाओरड केली. काही लोकांनी पाणी टाकून ही आग विझविली. बाजूच्या अपार्टमेंटमध्ये लावलेल्या सीसीटीव्हीत संशयित कैद झाले आहेत.
माजी आमदार गुरूमुख जगवानी यांच्या बंगल्याच्या बाजूला राहणारे सुभोद बुद्देलखंडी (वय-५१, रा. ओंकारेश्वर मंदिराजवळ रामदास कॉलनी) यांची टोयोटा कार (एमएच १९ बीयू ७७४४) अपार्टमेंटच्या बाहेर होती. मध्यरात्री अडीच वाजेच्या सुमारास याच अज्ञात व्यक्तींनी उभी असलेली कार पेटवून दिली. कारने मोठ्याप्रमाणावर आग धरल्याने अग्नीशमन बंबाने ही आग विझविण्यात आली.
गणपतीनगरातील शालिमार अपार्टमेंटमध्ये राहणारे गिरीष मोतीरामाणी यांचे नातेवाईक भारत तलरेजा ( रा. सिंधी कॉलनी) यांनी लॉकडाऊनमुळे सासरे बंन्सीलाल मोतीरामाणी यांच्याकडे फोर्ड कंपनीची कार (एमएच १९ सीयू ५५१५) पार्किंगला दीड महिन्यापासून लावली होती. मध्यरात्री १.४३ वाजेच्या अज्ञात व्यक्तीने पेट्रोल टाकले व पेटवून देण्याचा प्रयत्न केला. हा प्रकार घरासमोरील सीसीटीव्हीत कैद आहे. बंन्सीलाल मोतीरामाणी यांच्या घराच्या बाजूला राहणारे करण पोपली हे कुलरमध्ये पाणी टाकण्यासाठी उठले तेव्हा कार पेटविल्याचे लक्षात आल्याने त्यांनी आरडाओरड केली. अपार्टमेंटमध्ये राहणाऱ्या नागरिकांनी आग विझाविली. कारचे किरकोळ नुकसान झाले आहे
नीरज छाजेड यांची दुचाकी जाळण्याच्या अगोदर रोडवर आरोपी पाच मिनीट थांबले आणि नंतर दुचाकीवर पेट्रोल टाकून पेटविल्याचे सीसीटीव्ही मध्ये दिसून येत आहे. शालीमार आपार्टमेंटमध्ये संपुर्ण घटना कैद झाली आहे. रामानंदनगर पोलीस ठाण्यात तक्रार दाखल करण्यात आली आहे.
