जळगाव (प्रतिनिधी) – भिंतीच्या खाली खड्डा खोदून एमआयडीसी परिसरातील एच.डी.फायर कंपनीमध्ये प्रवेश करून १ लाख ४५ हजार ३०० रूपयांचा माल लांबविण्यात आला होता. याप्रकरणी जुन्या कामगारासह त्याच्या दोन साथीदारांना सोमवारी रात्री कुसूंबा व सुप्रिम कॉलनी परिसरातून एमआयडीसी पोलिसांनी बेड्या ठोकल्या आहेत. मंगळवारी त्यांना न्यायाधीश जे.एस.केळकर यांच्या न्यायालयात हजर केले असता, १२ मे पर्यंत पोलिस कोठडी सुनावण्यात आली आहे.
मंगळवार, दि. २ मे रोजी मध्यरात्री एमआयडीसी येथील एच.डी.फायर कंपनीच्या संरक्षक भिंती खाली खड्डा खोदून चोरट्यांनी कंपनीमध्ये प्रवेश केला होता. त्यानंतर १ लाख ३२ हजार ३०० रूपये किंमतीचे मिडल एल्बो आणि १३ हजार रूपये किंमतीचे एनगॉट ब्राँझ धातूच्या पट्टया चोरून नेल्या होत्या. या प्रकरणी कंपनीचे वरिष्ठ व्यवस्थापक मोहन कुलकर्णी यांच्या फिर्यादीवरून एमआयडीसी पोलिस ठाण्यात गुन्ह्याची नोंद करण्यात आली होती. पोलीस तपास सुरूच होता. एच.डी.फायर कंपनीमध्ये गेल्या दोन महिन्यांपूर्वी काम सोडून गेलेला कामगार देवानंद उर्फ देवा गोकूळ कोळी (रा. रामेश्वर कॉलनी) याने त्याचे मित्र विक्की आत्माराम कोळी (३२) व ईश्वर श्रावण महाजन (३४, दोन्ही रा. रामेश्वर कॉलनी) यांच्या मदतीने चोरी केल्याची माहिती एमआयडीसी पोलिसांच्या पथकाला मिळाली. पोलिस निरीक्षक जयपाल हिरे यांनी लागलीच तिघांचा शोध घेण्यास सुरूवात केली.
काही दिवसांपासून तीन तरूण दररोज मौजमजा करीत असून प्रचंड खर्च करीत आहेत, अशी माहिती पोलिसांना सोमवारी कळली. रात्रीच पोलिसांनी तिघांना ताब्यात घेतले. चौकशी केल्यानंतर तिघांमध्ये एक चोरी करणारा जुना कामगार आणि त्याचे दोन्ही साथीदार असल्याची बाब समोर आली. कसून चौकशी केल्यावर त्यांनी गुन्हा केल्याची कबुली दिली. त्यांना न्यायालयात हजर केले असता, १२ मे पर्यंत पोलिस कोठडी सुनावण्यात आली आहे. सरकार पक्षातर्फे ॲड. रंजना पाटील यांनी कामकाज पाहिले. एमआयडीसी पोलिस ठाण्याचे पोलिस निरीक्षक जयपाल हिरे यांच्या मार्गदर्शनाखाली सहाय्यक फौजदार अतुल वंजारी, छगन तायडे, किरण पाटील, इम्रान सैय्यद, सचिन पाटील, साईनाथ मुंडे, ललित नारखेडे यांनी ही कारवाई केली आहे.
