नाशिक, जळगाव उत्पादन शुल्क विभागाच्या जिल्ह्यात धडक कारवाया
जळगाव (प्रतिनिधी) – राज्य उत्पादन शुल्क विभाग, जळगाव आणि नाशिकच्या भरारी पथकाने जळगाव जिल्ह्यात गेल्या तीन दिवसात दि. २३ ते २५ जुलै दरम्यान धाडसत्र राबवित ६६ प्रकरणे दाखल केली असून ४७ संशयितांवर गुन्हे दाखल केले आहेत. तर ८ लाख ८२ हजार ५५ रुपयांचा मुद्देमाल जप्त केला आहे. याबाबत नागरिकांमध्ये समाधानाचे वातावरण असून कारवाई अशीच पुढे सुरु राहील, अशी माहिती निरीक्षक सी. एच. पाटील यांनी “केसरीराज” शी बोलताना दिली आहे.
काही दिवसांपूर्वी जिल्ह्याच्या कृषी विभाग व आपत्ती व्यवस्थापनच्या आढावा बैठकीत पालकमंत्री गुलाबराव पाटील, ग्रामविकासमंत्री गिरीश महाजन यांच्याकडे आ. मंगेश चव्हाण, आ. चंद्रकांत पाटील यांनी अवैध दारूविक्रीबाबत तक्रारी केल्या होत्या. त्यावरून पालकमंत्र्यांनी राज्य उत्पादन शुल्क विभागाची खरडपट्टी काढली होती. त्यानंतर उत्पादन शुल्क विभागाच्या जळगाव विभागासह नाशिक येथील भरारी पथकाने जिल्ह्यात रविवारपासून थेट धाडसत्र राबवित अवैध दारूविक्री करणाऱ्यांवर कारवाई केली.
धाडसत्रात महामार्गावर विविध हॉटेल, ढाब्यात पाऊचद्वारे विक्री करणारे, देशी-विदेशी दारू, हातभट्टीवाले यांच्यावर कारवाई झाली. तसेच, गुन्ह्यात वापरलेली वाहनेदेखील जप्त करण्यात आली आहे. यात प्रामुख्याने जळगाव तालुक्यात भोलाणे, देऊळगाव, चाळीसगाव तालुक्यात सायगाव, सांगवी, लोनजी, धरणगाव तालुक्यातील निंभोरा, साळवा, नांदेड, चांदसर यासह चोपडा, यावल, मुक्ताईनगर, जामनेर येथे कारवाई करण्यात आली आहे. जळगावच्या विभागाने चाळीसगाव विभागात १९ गुन्हे, जळगाव विभागात २१ तर भुसावळ विभागात १६ गुन्हे असे एकूण ५६ दाखल केलेले आहेत.
तर नाशिक येथील भरारी पथकाने १० गुन्हे दाखल करीत अवैध, भेसळीची दारूविक्री करणाऱ्या विक्रेत्यांमध्ये धडकी भरवली आहे. एकूण ४७ जणांवर गुन्हे दाखल झाले आहेत. कारवाई करण्यासाठी जळगाव जिल्हा अधीक्षक व्ही. टी. भुकन, निरीक्षक सी.एच.पाटील, वाय. वाय. सूर्यवंशी, जी. सी. कंखरे, लीलाधर पाटील, राजेश सोनार, सतीश पाटील, सुजित कपाटे, दुय्यम निरीक्षक शिवनाथ भगत, चेतन शिंदे, आर. जे. पाटील, देवदत्त पाचपोळ, व्ही. जी. पाटील यांच्यासह सहकाऱ्यांनी कारवाई केली. तर नाशिक भरारी पथकात निरीक्षक अरुण चव्हाण, दुय्यम निरीक्षक विजय पाटील व सहकाऱ्यांनी कारवाई केली.
