वॉशिंग्टन: करोनाच्या हाहाकाराने चिंतेत असलेल्या देशांना एक मोठा दिलासा देणारी बातमी समोर आली आहे. करोनावर औषध सापडले असल्याचा दावा संशोधकांनी केला आहे. करोनाबाधितांवरील उपचारासाठी ही लस परिणामकारक ठरत असल्याचे अमेरिकन संशोधकांनी म्हटले आहे.
अमेरिकेचे राष्ट्राध्यक्ष डोनाल्ड ट्रम्प यांचे सल्लागार डॉक्टर अँथोनी फॉउसी यांनी सांगितले की, रेमडेसिवीर औषधांच्या वापरानंतर करोनाबाधित रुग्णांच्या प्रकृतीत लक्षणीय सुधारणा होत असल्याचे समोर आले आहे. रेमडेसिवीर औषधांचा प्रयोग अमेरिका, युरोप आणि आशियातील ६८ ठिकाणांवरील १०६३ रुग्णांवर करण्यात आला होता. त्यानंतर हे औषध करोनाच्या आजारावर प्रभावी असल्याचे लक्षात आले असल्याची माहिती त्यांनी दिली. या औषधांने रुग्णांच्या प्रकृतीत सुधारणा होण्याचा दर हा इतर औषधांपेक्षा चांगला असल्याचाही दावा करण्यात आला आहे.
याआधी वुहानमध्येही हे औषध करोनाबाधितांवर फार परिणामकारक ठरले नव्हते असेही जागतिक आरोग्य संघटनेदेखील एका अभ्यासानंतर म्हटले होते. रेमडेसिवीर औषधाच्या या नव्या माहितीनंतर जागतिक आरोग्य संघटनेने अद्याप कोणतीही प्रतिक्रिया व्यक्त केली नाही. रेमडेसिवीर औषधांची आणखी काही चाचणी केल्यानंतर हे औषध करोनाबाधितांवर उपचारासाठी वापरण्यात येणार असल्याची चर्चा आहे.
‘ही’ लक्षणे दिसल्यास करावी लागणार करोना चाचणी
रेमडेसिवीर औषध हे इबोलाच्या आजाराला मात देण्यासाठी विकसित करण्यात आले होते. या औषधाने आणखीदेखील काही संसर्गजन्य आजारांवर मात करता येऊ शकते अशीही चर्चा आहे. वॉशिंग्टनमधील एका महिलेने सांगितले की, रेमडेसिवीर औषधामुळे करोनाबाधित पतीच्या प्रकृतीत सुधारणा झाली. याआधी अमेरिकेचे राष्ट्राध्यक्ष डोनाल्ड ट्रम्प यांनी देखील रेमडेसिवीर औषध करोनावर मात देण्यासाठी उपयुक्त ठरू शकते अशी शक्यता व्यक्त केली होती. शिकागो शहरात करोनाच्या आजाराने चिंताजनक प्रकृती असलेल्या १२५ रुग्णांना रेमडेसिवीर देण्यात आले. त्यातील १२३ जणांची प्रकृती सुधारली असल्याचे समोर आले आहे.
डॉक्टर फॉउसी यांच्या घोषणेनंतर जगभरात आनंद व्यक्त करण्यात येत आहे. अमेरिकेत करोनाचा संसर्ग सर्वाधिक झाला आहे. अमेरिकेत १० लाखांहून अधिकजणांना करोनाची बाधा झाली असून ६० हजारांहून अधिकजणांचा मृत्यू झाला आहे. जगभरात ३२ लाख नागरिकांना बाधा झाली असून २ लाख २८ हजारजणांचा मृत्यू झाला आहे.
