जळगाव (प्रतिनिधी) – बेशुद्धवस्थेतील सहा वर्षीय बालकाला घेऊन नातेवाईकांनी डॉ.उल्हास पाटील रुग्णालय गाठले, रुग्णालयातील बालरोग तज्ञांनी देखील केस पाहताच त्यांना अंदाज आला, तातडीने तपासण्या करुन उपचार सुरु झाले. बालकाला एन्सेफलायटीस (मेंदूज्वर) हा विकार जडला होता यात एक एक अवयव निकामी होतात मात्र रुग्णालयातील निष्णात बालरोग तज्ञांच्या अथक प्रयत्नांनी बालकाला मृत्युच्यादाढेतून ओढून आणले. आज बालक सुखरुप आहे.
डॉ.उल्हास पाटील रुग्णालयातील बालरोग तज्ञ डॉ.उमाकांत अणेकर यांनी सांगितले की, अशी केस आम्हा सर्वांच्या पाहणीतील पहिलीच केस आहे. बालकाला आणले तेव्हा तो बेशुद्ध होता, त्याला झटके येत होते, तापही होता तसेच इंट्राक्रेनियल हायपरटेंशन अर्थात मेंदूवरही सूज होती परिणामी बालक हाता-पायांची अवास्तव हालचाल आणि अवास्तव बडबड करत होता. दरम्यान बालकाचे ऑक्सीजन सॅच्युरेशनही कमी होते तसेच लघवी अंत्यत कमी होती. अर्थात बालकाचे सर्व अवयव निकामीहोण्याच्या मार्गावर होते. पण बालरोग विभागाचे प्रमुख प्रो.डॉ.अनंत बेंडाळे, मी स्वत: (डॉ.उमाकांत अणेकर), निओनेटोलॉजीस्ट डॉ.सुयोग तन्नीरवार, डॉ.विक्रांत देशमुख, डॉ.गौरव पाटेकर, निवासी डॉ.सुरुची शुक्ला, डॉ.चंदाराणी या टिमने जिद्दीने प्रयत्न करुन आवश्यक अॅण्टीबायोटिक्स, आयव्ही फ्ल्यूईड्स दिले तसेच वारंवार किडनी फंक्शन टेस्ट करुन सलाईन बोलसही दिले व इंजेक्शन लॅसिक्सही दिले असे करुन लघवीला नॉर्मल केले. त्याचवेळी ऑक्सीजन सॅच्यूरेशन वाढविण्यासाठी ऑक्सीजन सपोर्ट व उच्च रक्तदाब कमी करण्यासाठी हायपरटेंसिव व झटक्यांकरीता अॅण्टी इपेलेप्टिक ड्रग दिले. या सर्व ट्रिटमेंटचा हळूहळू परिणाम बालकावर दिसून येत होता, बालक उठून बसायला लागला, जेवण करु लागला.
तसचे एमआरआय केला असता बालकाच्या मेंदूवर सुज असल्याचे निर्दशनास आले, त्यावरही औषधोपचार केले. या संपूर्ण उपचारादरम्यान एका औषधीचा दुसर्या औषधीवर विपरित परिणाम होणार नाही याचाही सारासार विचार करुन आम्ही डॉक्टरांनी उपचार केले. या आजाराला एन्सेफलायटीस असे म्हणतात. ही केस आमच्या पाहण्यातही पहिल्यांदाच आल्यामुळे शिक्षक सुद्धा आयुष्यभर विद्यार्थीच असतो असेही डॉ.अणेकर यांनी सांगितले.
डॉक्टर साहेब तुमच्यामुळे मया पोरगा वाचला!
मी अशिक्षीत बाई, आम्ही शेतात मजुरी करतो तेव्हा घर चालते, एक मुलगी आणि एक मुलगा आहे, याआधी बर्याचदा मुले वारली. आता ह्या मुलाची तब्येत खराब झाली, मी घाबरली, हा वाचला नसता तर मी पण मरुन गेली असती. सावदा, भुसावळ येथील डॉक्टरांनी आमच्याकडे उपचार होणार नाही असे सांगितले. त्यामुळे येथे घेऊन आलो, इथल्या डॉक्टरांनी आम्ही प्रयत्न करतो असे सांगितले आणि खरोखरच आज माझा पोरगा इथल्या डॉक्टरांमुळेच वाचला, डॉक्टर साहेब लय आभारी आहे, महात्मा ज्योतिबा फुले योजनेंतर्गत उपचार झाले.
– साधना धनगर, रुग्णाची आई