कुटुंबीयांचा रुग्णालयात आक्रोश
जळगाव (प्रतिनिधी) – मेहरूण येथील रामेश्वर कॉलनीतील ३८ वर्षीय तरुणाने गळफास घेऊन आत्महत्या केल्याची घटना बुधवार दि. २६ एप्रिल रोजी घडली आहे. तरुणाने मृत्त्यूपूर्वी “सुसाईड नोट” लिहिली असून त्यात शेजारी राहणाऱ्या तिरमल कुटुंबियांच्या धमक्यांना कंटाळून आत्महत्या करीत असल्याचे म्हटले आहे. याप्रकरणी एमआयडीसी पोलीस स्टेशनला नोंद करण्यात आली आहे.
उमेश एकनाथ ठाकूर (वय-३७) रा. श्री स्वामी समर्थ केंद्राजवळ, रामेश्वर कॉलनी, जळगाव असे मृत तरूणाचे नाव आहे. उमेश ठाकूर हा आई, वडील, पत्नी व दोन मुलांसह राहतात. बुधवारी २६ एप्रिल रोजी दुपारी १ वाजेच्या सुमारास राहत्या घरात गळफास घेवून आत्महत्या केली. हा प्रकार त्यांचा मुलगा ओम याच्या लक्षात आल्याने समोर आला. मृतदेह पाहून पत्नी व आईने एकच हंबरडा फोडला होता. उमेश वाहतूक पोलिसांकडे ट्रॅफिक वॉर्डन म्हणून काम करीत असल्याची माहिती मिळाली.
शेजारी राहणाऱ्या तरूणानी धाव घेवून मृतदेह खाली उतरवून जिल्हा शासकीय वैद्यकीय महाविद्यालयात दाखल केले. वैद्यकीय अधिकारी डॉ. सचिन पाटील यांनी मयत घोषीत केले. यावेळी रुग्णालयात नातेवाईकांनी एकच गर्दी केली होती. एमआयडीसी पोलीस ठाण्यात अकस्मात मृत्यूची नोंद करण्यात आली आहे. मयत उमेशच्या पश्चात आई, वडील, भाऊ, विवाहित बहिण, पत्नी आणि दोन मुलं असा परिवार आहे. प्राथमिक तपास पोहेकॉ अल्ताफ पठाण करीत आहे.
“सुसाईड नोट” मध्ये नेमके काय ?
आत्महत्या करण्यापूर्वी उमेशने सुसाईड नोट लिहून ठेवल्याचे पोलिसांना दिसून आले आहे. यामध्ये घराशेजारी राहणाऱ्या तिरमल परिवाराला उमेशने दोषी धरले आहे. त्यात म्हटले आहे की, माझ्या आत्महत्येला ४ लोक जबाबदार आहेत. मला वारंवार मानसिक त्रास देऊन मानसिक त्रास देण्याचा प्रयत्न करीत जीवे ठार मारण्याची धमकी देत असतात. किशोर तिरमल, गजानन तिरमल, श्यामसुंदर तिरमल आणि त्यांची आई रुख्माबाई तिरमल यांच्या पासून आमच्या परिवाराला देखील धोका असून म्हणून मी हा निर्णय घेत आहे.
