जळगाव (प्रतिनिधी) – प्रवासात अनेकदा वैद्यकीय उपचाराची गरज भासत असल्याने डॉ.उल्हास पाटील रुग्णालयातर्फे जळगाव रेल्वे स्टेशनवर २३ जानेवारीपासून मोफत ओपीडी सेवा सुरु केली आहे. आतापावेतो ८५० हून अधिक रुग्णांनी सेवेचा लाभ घेतला. रुग्णालय जळगाव स्टेशनवर धर्मदाय प्राथमिक सेवा सुरळीत चालू असल्याबद्दल जळगाव स्टेशन अधिक्षक श्री. एस बी सणस यांनी समाधान व्यक्‍त केले. केवळ प्रवाशांसाठीच नव्हे तर स्टेशनवरील व्यवस्थापनासाठीसुद्धा ही सेवा फायदेशीर ठरली असल्याचेही ते म्हणाले.
जळगाव रेल्वे स्टेशवरुन मोठ्या प्रमाणावर प्रवाशी गाड्यांची ये-जा सुरु असते. प्रवासादरम्यान प्रकृती बिघडल्यास तात्काळ वैद्यकीय सेवा उपलब्ध होणे गरजेचे असते. त्यादृष्टीने वैद्यकीय सेवा देण्यासाठी रेल्वे प्रशासनाने डॉ.उल्हास पाटील रुग्णालयाशी विचारणा केली असता रुग्णालय प्रशासनाने संमती दर्शविली. २३ जानेवारीपासून जळगाव रेल्वे स्टेशनवर डॉ.उल्हास पाटील रुग्णालयाची ओपीडी सेवा सुरु झाली आहे. तीन महिन्यात जवळपास ८५० हून अधिक रुग्णांनी या सेवेचा लाभ घेतला आहे. याबाबत नुकतच स्टेशन अधिक्षक यांनी समाधान व्यक्‍त केल्यामुळे उत्‍तरोत्‍तर सेवेचा दर्जा निश्चितच वाढणार आहे.
यासंदर्भात मेडिकल सुपरिटेडेंट डॉ.प्रेमचंद पंडित म्हणाले की, ही सेवा प्रवशांसाठी खुप महत्वाची ठरत असून गरजेप्रसंगी अ‍ॅम्बुलन्स देखील उपलब्ध करुन दिली जाते. वैद्यकीय सेवा तात्काळ मिळाल्यास रुग्णाचा जीवावरील धोका टाळता येतो. याठिकाणी डॉ.उल्हास पाटील रुग्णालयातील तज्ञ डॉक्टर्स, प्रशिक्षीत नर्सिंग स्टाफ, मुबलक औषधसाठा याशिवाय रक्तदाब, ईसीजीची तपासणीही येथे होते.
उपचारार्थी मानतात आभार
रेल्वे प्रवासादरम्यान पडणे, धडपडणे, हृदयविकाराचा त्रास होणे, ग्लानी येणे, गरोदर महिलांना होणारा त्रास अशा अनेक समस्या उद्भवलेल्या रुग्णांनी या सेवेचा लाभ घेतला. तात्काळ आणि मोफत मिळालेल्या उपचारामुळे उपचारार्थी देखील मोफत सेवेचे आभार मानतात.
