आदिवासी पाड्यातील कर्करोगपीडित महिलेचे वाचविले प्राण
जळगाव (प्रतिनिधी) – जिल्ह्यातील रावेर तालुक्यातील निंभोरा येथील आदिवासी समाजाची महिला…परिस्थिती अत्यंत गरिबीची… कसेबसे प्रवासासाठी पैसे जोडून जिल्ह्याच्या रुग्णालयात मोठ्या आशेनं आली… तिची गंभीर अवस्था पाहून तत्काळ वैद्यकीय अधिकारी धावले… तब्बल सात दिवस उपचार करून महिलेची स्थिती पूर्वपदावर आणली… होय, हे सर्व आशादायी घडलेय शासकीय वैद्यकीय महाविद्यालय व रुग्णालयात.
येथील शासकीय वैद्यकीय महाविद्यालय व रुग्णालय येथे कोरोनाव्यतिरिक्त आजारांची ओपीडी दि. १७ डिसेंबर रोजीपासून सुरू झाली. पहिल्याच दिवशी पहिलीच रुग्ण म्हणून (वय – ४०) या महिलेचा केसपेपर देऊन स्वागत करण्यात आले होते. या महिलेला रक्तस्त्राव होत होता. महिलेला गर्भाशयाच्या मुखाचा कॅन्सर असल्याने महिलेची प्रकृती खालावत होती. त्यावेळी स्त्री रोग व प्रसूती शास्त्र तज्ज्ञ डॉ. संजय बनसोडे यांनी तपासणी केल्यावर महिलेला दाखल करून घेतले. ऑक्सिजन कमी होत असल्याने तत्काळ त्यांना व्हेंटिलेटरची अद्ययावत सुविधा देऊन ऑक्सिजन पातळी वाढविली. तसेच हिमोग्लोबिन २.५ ग्राम होता. ४ रक्ताच्या पिशव्यादेखील गेल्या सात दिवसात महिलेला उपचारासाठी देण्यात आल्या.
