जळगाव ( प्रतिनिधी ) – तालुक्यातील कुसुंबा येथील तरूणाने राहत्या घरात गळफास घेवून आत्महत्या केली . त्याने आत्महत्या करण्याचे कारण लगेच समजू शकले नाही. एमआयडीसी पोलीसात अकस्मात मृत्यूची नोंद करण्यात आली आहे. धनंजय चंद्रजित बाविस्कर (वय-२५ , रा. धनवाडी ता. चोपडा ह.मु. कुसुंबा ता.जि.जळगाव ) असे गळफास घेतलेल्या तरूणाचे नाव आहे.
धनंजय बाविस्कर दोन वर्षांपासून पत्नी उज्ज्वलासह कुसुंब्यात वास्तव्याला होता. त्याच गावात धनंजयची बहिण शुभांगी आणि मेहुणे दिपक पाटील राहतात. एमआयडीसीतील ट्रान्सपोर्ट कंपनीत तो नोकरीला होता. अक्षयतृतीयेच्या निमित्ताने पत्नी उज्ज्वला माहेरी गेली असल्याने धनंजय घरी एकटाच होता. शनिवारी रात्री १० वाजता बहिण शुभांगीकडे जेवण केले आणि तो त्याच्या घरी निघून आला. मध्यरात्री धनंजयने रूमालाने गळफास घेवून आत्महत्या केली. सकाळी ११ वाजले तरी धनंजय उठला नाही अशी शंका शेजारी राहणाऱ्यांना आली. शुभांगी घरी आल्यावर भावाने गळफास घेतल्याचे लक्षात आले. त्यांना तातडीने जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषीत केले. एमआयडीसी पोलीस ठाण्यात गुन्हा दाखल करण्यात आला. पुढील तपास महेंद्र गायकवाड, नरसिंग पाडवी हे करीत आहेत . शविच्छेदन करून मृतदेह नातेवाईकांच्या ताब्यात देण्यात आला मयताच्या पश्चात पत्नी उज्वला, आई, वडील व बहिण असा परिवार आहे.
