जळगाव ( प्रतिनिधी ) – बचत गटाची वसूली करणाऱ्या खासगी बँक व्यवस्थापकाच्या डोक्यावर पिस्तूल ठेवत बॅगेतील रोकड आणि मोबाईल टॅब असा १ लाख १४ हजार ६२९ रुपयांच्या मुद्देमालाची लूट विटनेर गावाच्या रस्त्यावर ३ दरोडेखोरांनी केली या घटनेमुळे तालुक्यात खळबळ उडाली आहे. एमआयडीसी पोलीस ठाण्यात अज्ञात तीन जणांविरोधात गुन्हा दाखल करण्यात आला
सुनील शेषराव पाढाळे (वय-२६ , रा. रहिमाबाद ता. सिल्लोड, ह.मु. हिवरखेडा रोड जामनेर ) हे जामनेर येथील क्रेडिट एक्सेस ग्रामीण लिमिटेड या बँकेत केंद्र व्यवस्थापक म्हणून नोकरीला आहे. बँकेच्या माध्यमातून महिला बचत गटांना लघु उद्योगासाठी कर्ज दिले जाते. कर्ज वसुलीसाठी शाखेमार्फत १० कर्मचारी नेमण्यात आले आहे. त्या माध्यमातून ते जिल्ह्यातील ३५ केंद्रातून बचत गटातून पैसे वसूलीचे काम करतात. सुनील पाढाळे मंगळवारी कर्जाची रक्कम वसूली करण्यासाठी लोणवाडी येथे एमएच २० डीजे १६६० क्रमांकाच्या मोटारसायकल वरून गेले. ९५ हजार ८७३ रुपयांची वसुली करून दुपारी वरडमार्गे विटनेरकडे निघाले. वराड आणि विटनेर गावाच्या रस्त्याने जात असताना मागून अज्ञात तीन व्यक्ती पाठलाग करत आले. सुनील पाढाळे यांच्या दुचाकीला ओव्हरटेक करून पुढे गेले. तिघे समोर अचानक आल्याने सुनील यांनी ब्रेक लावला व ते खाली पडले. नंतर तिघांनी त्यांना चापटा मारल्या व खांद्याला लावलेली पैशांची बॅग ओढण्याचा प्रयत्न केला. सुनील यांनी विरोध केला असता एकाने कमरेतून पिस्तूल काढून त्यांच्या डोक्याला लावली. “बॅग सोड नाहीतर गोळी मारेल” अशी धमकी दिली. बॅग हिसकावून दुचाकीवरून पसार झाले. या बॅगमध्ये ९५ हजार ८७३ रुपयांची रोकड आणि सुनील यांचा १८ हजार ७५६ रुपये किमतीचा मोबाईल टॅब असा १ लाख १४ हजार ६२९ रुपयांचा मुद्देमाल चोरून नेला. सुनील पाढाळे यांनी एमआयडीसी पोलीस ठाण्यात धाव घेऊन माहिती दिली.
पो नि प्रताप शिकारे, पो नि किरणकुमार बकाले, सपोनि अमोल मोरे, सहाय्यक फौजदार अतुल वंजारी, स्वप्नील पाटील, हेमंत पाटील, प्रदीप पाटील, स्थानिक गुन्हे शाखेचे अंमलदार घटनास्थळी धाव घेवून माहिती जाणून घेतली. पुढील तपास पोउनि रवींद्र गिरासे, सचिन मुंडे करीत आहेत .
