जळगाव ( प्रतिनिधी ) – जालना ते जळगाव रेल्वे मार्गाच्या अंतिम सर्व्हेला केंद्रीय रेल्वे राज्यमंत्री रावसाहेब दानवे यांनी मंजुरी दिली रेल्वे मंत्रालयाने या प्रकल्पाच्या सर्वेक्षणासाठी साडे चार कोटी निधी मंजूर केला हा 174 किलोमीटर लांबीचा मार्ग असून सर्वेक्षणाचे काम 23 ते 25 मार्च या कालावधीत होणार असून रेल्वे अधिकारी जालन्यात दाखल झाले आहेत.
हे अधिकारी जालना ते जळगाव मार्गावरील विविध गावांना भेटी देणार आहेत. त्यानंतर अहवाल रेल्वे विभागाकडे दिला जाईल. हा रेल्वे मार्ग झाल्यानंतर मराठवाड्याच्या ग्रामीण भागातील औद्योगिक विकासासह, व्यापार, दळणवळण, शेती, लघुउद्योग आणि पर्यटन विकासाला चालना मिळणार आहे.
मुंबई येथील मुख्य परिचलन अधिकारी व्ही. नलीन, मुख्य दळणवळण अधिकारी रविप्रकाश गुजराल व मुकेश लाल या तीन सदस्यांची टीम जालना-जळगाव रेल्वे मार्गाचे अंतिम सर्वेक्षण करणार आहे. अधिकारी जालना, राजूर गणपती, तहसील कार्यालय भोकरदन, सिल्लोड, अजिंठा व जळगाव जिल्ह्यात विविध ठिकाणी भेटी देणार आहेत.
जालना ते जळगाव हा रेल्वेमार्ग जालना, पिंपळगाव, पांगरी, राजूर, भोकरदन, सिल्लोडमार्गे गोळेगाव, अजिंठा, फर्दापूर, जळगावपर्यंत जाणार आहे.
174 किमीच्या या मार्गाद्वारे जगप्रसिद्ध अजिंठा लेणीं रेल्वे मार्गाला जोडले जाईल. याचा फायदा सुरत, गुजरात, राजस्थानच्या गाड्यांना आंध्रप्रदेशकडे जाण्यासाठी छोटा मार्ग म्हणून होणार आहे. जालना ते जळगाव या 174 किलोमीटर लांबीच्या रेल्वे मार्गाचे आता फायनल लोकेशन सर्वेक्षण केले जात आहे.
