चोपडा (प्रतिनिधी ) – शहरातील रंगराव आबा नगर भागात आपल्या कुटुंबात राहणारा गिरीश झुलाल पाटील हा खाजगी रुग्णवाहिकेवर चालक म्हणून काम करत होता. मंगळवारी मध्यरात्री मंगळवारी मध्यरात्री सर्व कुटुंबिय झोपल्यानंतर १२ वाजून ४७ मिनिटांनी गिरीश याने आपल्या व्हाट्स अप चल..बाबू..बाय ! असे स्टेटस ठेवले होते. त्यानंतर त्याने पहाटे घरातील जिन्याच्या लोखंडी बीमला दोरी बांधून गळफास घेत गिरीशने जगाचा निरोप घेतला. बुधवारी सकाळी कुटुंबिय उठल्यावर गिरीश हा घरात गळफास घेतलेल्या अवस्थेत मिळून आल्यानंतर आईने हंबरडाच फोडला.
गिरीश हा रुग्णवाहिका चालक असल्याने त्याची चोपडा उपजिल्हा रुग्णालयात परिचय होता. तर याच रुग्णालयात शवविच्छेदन करणारा प्रशांत पाटील हा गिरीशचा मित्र होता. आत्महत्येच्या आदल्या दिवशी म्हणजेच मंगळवारी दुपारी गिरीश हा उपजिल्हा रुग्णालयात प्रशांत पाटील याला भेटला होता. उद्या तुलाच माझेच पोस्टमार्टम करायचे आहे, सांभाळून करशील, डोकं जास्त फाडु नको,आणि माझ्या आईला माझी छन्न विच्छिन्न केलेली बॉडी दाखवू नको,असेही गिरीश याने प्रशांत याला सांगितले होते.
मात्र गिरीश याचे म्हणणे प्रशांत याने मनावर घेतले नाही, आणि जास्त बडबड करु नको, आपले काम कर असे म्हणत प्रशांत हा गिरीशला म्हणाला होता, मात्र दुसऱ्या दिवशी गिरीश खरंच आत्महत्या करेन अशी पुसटशीही कल्पना प्रशांत याला नव्हती. मात्र हे पण काय माहिती की खरंच त्यालाच गिरीश याचा मृतदेह खाली उतरवून , पोस्टमार्टम करावे लागेल, पण तसंच घडलं. ज्या रुग्णालयात आपल्या दोन्ही हातांनी अनेक शवविच्छेदन केले त्याच प्रशांतला सुध्दा या घटनेने मोठा धक्का बसला आहे. गिरीश हा त्याच्या परिवारातील एकुलता एक मुलगा आहे. गिरीश याच्या वडीलांचे निधन झाले आहे. गिरीश याच्या पश्चात आई आणि दोन विवाहित बहिणी असा परिवार आहे. एकुलता एक व कर्त्या मुलगा गिरीशच्या मृत्यूने त्याच्या आईचा आधार हरवला असून आता कस जगावं या विचाराने ती सुन्न झाली आहे. या प्रकरणी चोपडा शहर पोलिसात अकस्मात मृत्यूची नोंद करण्यात आली आहे. बुधवारी दुपारी शोकाकुल वातावरणात मयत गिरीशवर अंत्यसंस्कार करण्यात आलेत. गिरीशने प्रेमभंगातून आत्महत्या केल्याची चर्चा आहे.
