जामनेर ( प्रतिनिधी ) – सहकारी महिलेचा विनयभंग केल्याच्या आरोपात पहूर रूग्णालयाचे तत्कालीन वैद्यकीय अधिकारी जितेंद्र वानखेडे यांना न्यायालयाने एक वर्ष सश्रम कारावासाची शिक्षा सुनावली आहे.
पहूर येथील तत्कालीन वैद्यकीय अधिकारी डॉ.जितेंद्र प्रल्हाद वानखेडे यांनी सहकारी महिला डॉक्टरची छेड काढल्याचा वाद चांगलाच गाजला होता . डॉ. जितेंद्र वानखेडे कामावर नसताना २ जून, २०२१ रोजी मध्यरात्री रुग्णालयात गेले. पत्नीच्या वाढदिवसानिमित्त तुमच्यासाठी नॉनव्हेज आणले असल्याचे सांगून मध्यरात्री महिला वैद्यकीय अधिकारी झोपलेल्या खोलीचा दरवाजा ठोठावला. महिला डॉक्टरने नकार देऊनही बराचवेळ डॉ.जितेंद्र वानखेडे दरवाजा ठोठावत होता. त्यामुळे महिलेने दार उघडून पार्सल घेऊन दरवाजा बंद केला.
यावेळी डॉ.वानखेडेने मद्यप्राशन केले होते. त्यानंतर पुन्हा वारंवार फोन करून येण्याचा आग्रह केला. घाबरलेल्या संबंधित महिला डॉक्टरने अन्य सहकार्यांना फोन करून घडलेला प्रकार सांगितला. पहूर पोलिस ठाण्यात विनयभंगाचा गुन्हा दाखल करण्यात आला होता .
या प्रकरणी दोषारोपपत्र दाखल केल्यानंतर न्या. डी.एन. चामले यांच्या न्यायालयात हा खटला चालला. यात डॉ. वानखेडे यांनी सहकारी वैद्यकीय अधिकारी महिलेचा विनयभंग केल्याप्रकरणी न्यायालयाने एक वर्ष सक्तमजुरी व पाच हजार रुपयांचा दंड ठोठावला. सरकार पक्षातर्फे अँड . कृतिका भट यांनी बाजू मांडली.
