“श्री परशुराम जन्मोत्सव २०२३” अंतर्गत उपक्रम
जळगाव (प्रतिनिधी) – पौरोहित्य् करणाऱ्या ब्राह्मणाप्रती तरुण वर्गात् आदर निर्माण केला पाहिजे. तसेच, पारंपारिक वेश सांभाळणे खूप मोठी बाब आहे. तरूण पिढीला हे शिकविले पाहीजे, ब्राह्मण समाजाला संघटन करून ते कायमस्वरूपी टिकवावे लागेल,असे प्रतिपादन हभप चारुदत्त आफळे महाराज यांनी केले.
दरवर्षीप्रमाणे बहुभाषिक ब्राह्मण संघातर्फे “श्री परशुराम जन्मोत्सव २०२३” अंतर्गत विविध उपक्रमांचे आयोजन करण्यात आले आहे. गुरुवारी “आजचा ब्राह्मण समाज, दशा व दिशा” या विषयी हभप चारुदत्त आफळे महाराज यांचे व्याख्यान संध्याकाळी ६ वाजता छत्रपती संभाजीराजे नाट्यगृहमध्ये आयोजित करण्यात आले होते. प्रसंगी मुख्य अतिथी म्हणून अविनाश नांदेडकर, श्रीराम खटोड, बहुभाषिक ब्राह्मण संघाचे अध्यक्ष डॉ. अजित नांदेडकर, महिला मंडळ अध्यक्षा मनीषा दायमा मंचावर उपस्थित होते.
सुरुवातीला मान्यवरांनी दीपप्रज्वलन करून भगवान परशुरामाच्या प्रतिमेचे पूजन केले. प्रस्तावनेतून श्रीकांत खटोड यांनी कार्यक्रमाविषयी माहिती देऊन, समाजबांधवांच्या प्रबोधनाच्या उद्देशाने व्याख्यान आयोजित केल्याचे सांगितले. डॉ. अजित नांदेडकर यांनी, बहुभाषिक ब्राह्मण संघाविषयी माहिती दिली. प्रसंगी परशुराम सेवा समितीचे देणगीदार, परशुराम सेवक व परशुराम दूत यांचा मान्यवरांच्या हस्ते सन्मान करण्यात आला.
चारुदत्त आफळे यांनी सांगितले की, समाज बांधवांनी आपल्या कुटुंबाचे हित कशात आहे याचा विचार सातत्याने केला पाहिजे. कुटुंबातील तरुण पिढी आपल्या इतिहासाचे जतन कसे करेल तसेच कुटुंबहित व देशहित लक्षात घेऊन त्या दृष्टीने कसे कार्य करता येईल यासाठी तरुण पिढीला सतत मार्गदर्शन केले पाहिजे.
प्रत्येक घराघरांमध्ये रामरक्षा म्हटली गेली पाहिजे. या विश्वातील सर्व दैवते मंत्राधीन आहेत. ही मन्त्रे ब्राह्मणांकडे आहे. आपण परमार्थ करण्यात आपले सामूहिक प्रयत्न कमी पडत आहेत. हे सामूहिक प्रयत्न वाढवले पाहिजे असेही ते म्हणाले. ब्राह्मण समाजाचे संघटन अनेक वेळा खूप झाले, मात्र संघर्ष अनेकदा कमी पडले. संघर्ष करण्यात आपण कमी पडू नये असेही ते म्हणाले.
सूत्रसंचालन अमोल जोशी, पल्लवी कुलकर्णी, मंजुषा अडावदकर यांनी केले. आभार स्वाती कुलकर्णी यांनी मानले. कार्यक्रमासाठी बहुभाषिक ब्राह्मण संघाच्या पदाधिकारी, कार्यकर्त्यांनी परिश्रम घेतले.
सकाळी कलादर्शन
गुरुवार २० एप्रिल रोजी सर्वप्रथम सकाळी १०.३० वाजता छत्रपती संभाजी नाट्यगृहात उदयोन्मुख युवा तरुणांचे कला सादरीकरण सादर झाले. यावेळी सौरभ चौबे, राहुल दायमा, आनंद दशपुत्रे प्रमुख पाहुणे म्हणून उपस्थित होते. यावेळी समाजातील १५ तरुणांनी गायन, वादन सादर केले. यात भक्तिगीते व चित्रपटातील गीतांचाही समावेश होता. युवक-युवतींनी उत्स्फूर्तपणे सहभाग घेत कलागुणांचे सादरीकरण केले. प्रसंगी समाजबांधवांची मोठ्या संख्येने उपस्थिती होती.
