चाळीसगाव ( प्रतिनिधी ) – पोलीस ठाण्यात दाखल गुन्ह्यात मदत करण्याच्या मोबदल्यात १ लाख रूपयांची लाच घेणारा मेहुणबारे पोलीस ठाण्याच्या पोलीस उपनिरीक्षकाला लाचलुचपत विभागाने रंगेहात पकडले आहे. या कारवाईमुळे पोलीस खात्यात खळबळ उडाली आहे.
तक्रारदार यांच्याविरोधात मेहुणबारे पोलीस ठाण्यात २९ मार्च रोजी गुन्हा दाखल करण्यात आला या गुन्ह्यातील कागदपत्रांमध्ये मदत करून चार्जशिट लवकरात लवकर पाठवून गुन्ह्यात मदत करण्याच्या मोबदल्यात मेहुणबारे पोलीस ठाण्याचे पोलीस उपनिरीक्षक योगेश जगन्नाथ ढिकले (वय-३२ , रा.- जिजाई नगर, तिरपुळे रोड, मेहुणबारे ता. चाळीसगाव ) यांनी ४ लाख ५० हजाराची मागणी केली होती. तडजोडी अंती १ लाख रूपये देण्याचे ठरविले होते. दरम्यान, तक्रारदार यांनी जळगाव लाचलुचपत विभागाशी संपर्क साधून माहिती दिली. त्यानुसार खात्री करण्यासाठी लाचलुचपत विभागाने २ जूनरोजी सापळा रचून पोलीस उपनिरीक्षक योगेश ढिकले याला १ लाख रूपयांची रक्कम घेतांना रंगेहात पकडले आहे. मेहुणबारे पोलीस ठाण्यात गुन्हा नोंदविण्यात आला .
लाचलुचपत प्रतिबंधक विभागाचे पोलीस उपअधिक्षक शशिकांत पाटील यांच्या मार्गदर्शनाखाली पो नि संजोग बच्छाव, पो नि एन.एन.जाधव, स फौ दिनेशसिंग पाटील, स फौ सुरेश पाटील, पोहेकॉ अशोक अहीरे, सुनिल पाटील, रविंद्र घुगे, महिला पोहेकॉ शैला धनगर, पोना मनोज जोशी, जनार्धन चौधरी, सुनिल शिरसाठ, प्रविण पाटील, महेश सोमवंशी, नासिर देशमुख, ईश्वर धनगर, प्रदिप पोळ या पथकाने ही कारवाई केली.
