भुसावळ ( प्रतिनिधी ) – भुसावळ शहर गेल्या काही दिवसांपासून शांत असल्याने पुन्हा एकदा गोळीबाराने खळबळ माजली आहे.
भुसावळ शहराजवळ असलेल्या साकरी रस्त्यावर काल रात्री उशीरा गोळीबाराची घटना घडली. यात दोन तरूण जखमी झाले असून त्यांना उपचारासाठी रूग्णालयात दाखल करण्यात आले आहे. गोळीबार झाल्याची माहिती मिळताच पोलिसांनी घटनास्थळी जावून तपासाची चक्रे फिरवण्यास प्रारंभ केला आहे.
भुसावळात मध्यंतरी अनेक टोळ्यांवर प्रतिबंधात्मक कारवाई करण्यात आल्याने गुन्हेगारीवर काही प्रमाणात तरी नियंत्रण मिळविण्यात आल्याचे दिसून येत होते. तथापि, काल रात्री सुमारे साडेनऊच्या सुमारास झालेल्या गोळीबारामुळे पोलिसांना आव्हान मिळाल्याचे दिसून येत आहे.
दरम्यान, गोळीबाराची माहिती मिळताच डीवायएसपी सोमनाथ वाघचौरे व तालुका पोलीस स्थानकाचे पोलीस निरिक्षक विलास शेंडे यांनी घटनास्थळी भेट दिली असून याबाबतची माहिती जाणून घेतली. या गोळीबाराला पूर्व वैमनस्याची किनार आहे का ? या दिशेने तपास सुरू आहे.
