धुळे (प्रतिनिधी) – तस्करी करणारे केव्हा काय शक्कल लढवतील, काही सांगता येत नाही. अशाच एका देशी दारू वाहतूक करणाऱ्याला एस.टी.बस वाहकाच्या सतर्कतेनंतर शहर पोलिसांनी गजाआड केले आहे. तो सुरत येथे जात होता. त्याच्याकडे चार पोत्यांतून २४ हजारांची देशी दारू जप्त करण्यात आली आहे. याप्रकरणी गुन्हा दाखल करण्यात आला आहे.
धुळे मध्यवर्ती बसस्थानकात आज सकाळी सव्वा दहा वाजता अमळनेर-बडोदा बस (क्रं.एमच-२०-बीएल २५३४) दाखल झाली. त्यानंतर या बसवरील वाहकाला बसमधील एक प्रवासी ४ गोण्यांमध्ये काहीतरी संशयास्पद स्थितीत सुरत येथे घेऊन जात असल्याचे लक्षात आले. त्याने आगार व्यवस्थापकांना सांगितले. त्यांनी तत्काळ बस स्थानकातील डयुटीवरील पोलिस हवालदार ज्ञानेश्‍वर साळुंके व पोलिस नाईक वैभव वाडीले यांना ही माहिती दिली. त्यांनी पोलीस निरीक्षक आनंद कोकरे यांना कळविले.
निरीक्षक आनंद कोकरे यांनी तत्काळ शोध पथकातील पोना कुंदन पटाईत, पोकॉ महेश मोरे, मनिष सोनगिरे, अविनाश कराड, प्रविण पाटील, गुणवंतराव पाटील व निलेश पोतदार यांच्या पथकाला बसस्थानकात पाठविले. पथकाने अमळनेर-बडोदा या बसमधील प्रवासी प्रविण मोतीराम पाटील (रा. सुरत, गुजरात) याच्याकडील ४ गोण्या उघडून बघितल्या. तेव्हा त्यात तांदळाची साळमध्ये देशी दारु सौफ नावाच्या ९० मि.ली च्या एकुण ७०० प्लास्टीकच्या सिलबंद बाटल्या मिळून आल्या. त्यामुळे प्रवासी प्रविण पाटील याला ताब्यात घेत त्यांच्याकडून एकुण २४ हजार ५०० रुपयांच्या देशी दारूच्या बाटल्या जप्त करण्यात आल्या. याप्रकरणी शहर पोलिसात गुन्हा दाखल करण्यात आला आहे.
