पिंपरी (वृत्तसंस्था) – फिनेल पिऊन इमारतीच्या सहाव्या मजल्यावरून उडी मारून आत्महत्येचा प्रयत्न केलेल्या महिलेचा उपचारादरम्यान मृत्यू झाला. ही घटना 1 फेब्रुवारी रोजी घडली चिखली येथे घडली होती. या महिलेला उपचारासाठी वायसीएम रुग्णालयात दाखल करण्यात आले होते. तिच्यावर उपचार सुरु असतानाच माहेर आणि सासरच्या मंडळींमध्ये वायसीएमच्या परिसरातच तुंबळ हाणामारी झाली होती.
आत्महत्या केलेल्या 20 वर्षीय महिलेच्या आईने याबाबत बुधवारी (दि. 10) चिखली पोलीस ठाण्यात फिर्याद दिली आहे. त्यानुसार पती आकाश सुनील पाचंगे, सासरे सुनील सिद्राम पाचंगे आणि सासू (सर्व रा. घरकुल, चिखली ) यांच्या विरोधात गुन्हा दाखल करण्यात आला आहे. विवाहितेला सासरच्या मंडळींनी मानसिक आणि शारीरिक त्रास देऊन आत्महत्या करण्यास प्रवृत्त केल्याचे फिर्यादीत म्हटले आहे.
विवाहितेने एक फेबुवारी रोजी फिनेल पिऊन इमारतीच्या सहाव्या मजल्यावरून उडी मारून आत्महत्येचा प्रयत्न केला. तिला तात्काळ उपचारासाठी पिंपरीतील वायसीएम रुग्णालयात दाखल करण्यात आले. तिच्यावर उपचार सुरु असताना माहेर आणि सासरच्या मंडळींमध्ये वायसीएम रुग्णालय परिसरात तुंबळ हाणामारी झाली. त्यात सात ते आठजण किरकोळ जखमी झाले होते.
तसेच या राड्यात दोन डॉक्‍टरांच्या वाहनांचे देखील नुकसान झाले होते. त्यानंतर दंगा काबू पथकाला पाचारण करण्यात आले. पोलिसांनी परिस्थिती नियंत्रणात आणली. जखमी विवाहितेवर वायसीएम रुग्णालयात उपचार सुरु होते. उपचारादरम्यान तिचा मृत्यू झाला.
