जळगाव (प्रतिनिधी) – नवीन पोलीस अधीक्षकांनी पदभार घेऊन महिना उलटत नाही तोवर जबरी घरफोडीची आणखी घटना उघडकीस आली आहे. चक्क पोलीस अधीक्षक आणि उपविभागीय पोलीस अधिकाऱ्यांच्या घरासमोर असणाऱ्या बंद घरावर चोरट्यांनी नजर ठेवून त्या ठिकाणी जबरी घरफोडी केल्याचे दिसून आले आहे. दरम्यान, रामानंदनगर पोलीस स्टेशनला गुन्हा दाखल करण्याचे काम सुरू आहे.
एकनाथ नारायण चौधरी यांचे घर ओंकारेश्वर मंदिर परिसरात आहे. त्यांचे निधन झाले आहे. या घरात त्यांची पत्नीच राहतात. घराच्या समोर रस्ता ओलांडून उपविभागीय पोलीस अधिकाऱ्यांचे घर आहे. तसेच काही अंतरावर पोलीस अधीक्षकांचा देखील बंगला आहे. यांचे बंद घर पाहून चोरांनी पाळत ठेवून घरात जबरी घरफोडी केल्याचे शुक्रवार ११ नोव्हेंबर रोजी संध्याकाळी उघडकीस आले आहे.
शिरसोली रोडवरील श्रीकृष्ण लॉन्सचे चौधरी हे संचालक आहेत. एकनाथ चौधरी यांच्या पत्नी मुलीकडे अमेरिकेला गेल्या आहेत. रामानंदनगर पोलिसांना माहिती मिळताच त्यांनी घटनास्थळी भेट दिली. प्रथमदर्शनी घरामधून तिजोरी, सीसीटीव्ही, डीव्हीआर आदी वस्तू चोरीला गेल्याचे दिसून येत आहे. घरमालक आल्यानंतरच किती रुपयांची व किती वस्तूंची चोरी झाली हे समजून येणार आहे.
