धुळे (प्रतिनिधी) – राज्यात १० वर्षांपूर्वी जादूटोणाविरोधी कायदा अस्तित्वात आला आहे. मात्र तरीही जादूटोणाच्या नावाखाली लोकांची फसवणूक करणे, शोषण करणे अद्यापही थांबत नाही. धुळ्यात तर चक्क न्यायालयाच्या आवारातच खटला जिंकण्यासाठी विरोधी पक्षाच्या वकिलावर जादूटोणा करण्याचा प्रयत्न झाल्याचा धक्कादायक प्रकार घडला आहे. वकिलाच्या फिर्यादीवरून एकाविरूद्ध गुन्हा दाखल होऊन संशयिताला अटकही झाली आहे. यामुळे एकच चर्चा सुरु आहे.
ॲड शामकांत रावजी पाटील यांच्या फिर्यादीवरून गुरुवारी ९ रोजी निसार शेख अमीर खाटीक याच्या विरोधात नरबळी आणि इतर अघोरी प्रथा व जादूटोणा प्रतिबंधक कायदानुसार धुळे शहर पोलिस ठाण्यात गुन्हा दाखल करण्यात आला आहे. निसार शेख अमिर खाटीक विरुद्ध पंढरीनाथ भिला पाटील यांच्या विरोधात दिवाणी दावा क्र २१९/ २९१६ प्रमाणे गुन्हा दाखल केला आहे.
धुळे येथील दिवाणी वरीष्ठ न्यायाधीश यांच्या न्यायालयामध्ये सुरु असलेल्या सदर दाव्याच्या अंतिम युक्तीवादामध्ये पंढरीनाथ भिला पाटील यांचे वकील ॲड. शामकांत पाटील यांनी जास्त बोलू नये किंवा त्यांची बोलती बंद करण्यासाठी हा जादूटोणा करण्याचा प्रकार झाला. संशयित आरोपीने न्यायालयाची इमारत व आवारामध्ये विना परवानगी पक्षकार पंढरीनाथ पाटील आणि त्यांचे वकील शामकांत पाटील यांचे फोटो जादुटोणा करण्याच्या उद्देशाने नाशिक येथील एका मौलानाच्या मोबाईल व्हॉट्सअपवर पाठविले. ही बाब ॲड. शामकांत पाटील यांच्या लक्षात आल्यानंतर त्यांनी संबंधित संशयित आरोपी निसार शेख आमिर खाटीक याची चौकशी करून मोबाईलची तपासणी केली. त्यानुसार ॲड. शामकांत पाटील यांनी धुळे शहर पोलीस ठाण्यात याबाबत गुन्हा दाखल केला असून यातील आरोपी निसार शेख समीर खाटीक रा. देवपूर याला शहर पोलिसांनी अटक केली आहे. पुढील तपास धुळे शहर पोलीस ठाण्याचे पोलीस निरीक्षक आनंद कोकरे करीत आहेत.
