जामनेर तालुक्यात नेरी फाट्यावर घटना
जामनेर (प्रतिनिधी):- बसची वाट पाहत उभ्या असलेल्या एका ७० वर्षीय वृद्ध महिलेच्या गळ्यातील सोन्याचे मणी मंगळसूत्र हातचलाखीने चोरणाऱ्या दोन महिलांना जामनेर पोलिसांनी अटक केली आहे. ही घटना बुधवार, ११ मार्च रोजी सकाळी १०:३० वाजेच्या सुमारास म्हसावद चौफुली परिसरात नेरी दिगर फाट्यावर घडली.
देवपिंप्री (ता. जामनेर) येथील रहिवासी सुलोजना जानकीराम शेळके (वय ७०) या बुधवारी सकाळी जामनेरला जाण्यासाठी म्हसावद चौफुली येथे बसची वाट पाहत उभ्या होत्या. यावेळी संशयित आरोपी महिला सुरेखा राजू शिंदे (वय ३६, रा. राजीव गांधी नगर, जळगाव) आणि म्हाळसाबाई प्रल्हाद सकट (वय ४७, रा. हरिविठ्ठल नगर, जळगाव) या दोघींनी संगनमत करून सुलोजना यांच्या गळ्यातील सुमारे ३० हजार रुपये किमतीचे ३ ग्रॅम वजनाचे सोन्याचे मणी मंगळसूत्र लंपास केले.
मंगळसूत्र चोरल्यानंतर या महिलांनी ते चोरलेला ऐवज आपल्या पर्समध्ये लपवून ठेवला होता. मात्र, संशयावरून या महिलांची तपासणी केली असता चोरीचा प्रकार उघडकीस आला. याप्रकरणी सुलोजना शेळके यांच्या फिर्यादीवरून जामनेर पोलीस ठाण्यात गुन्हा दाखल करण्यात आला आहे.
पोहेका गणेश भावसार या प्रकरणाचा पुढील तपास करत आहेत. जळगाव जिल्ह्यातील गर्दीच्या ठिकाणी महिलांच्या दागिन्यांची चोरी करणाऱ्या टोळ्या सक्रिय असल्याने नागरिकांनी, विशेषतः ज्येष्ठ नागरिकांनी प्रवासात सतर्क राहण्याचे आवाहन पोलिसांनी केले आहे.
