चाळीसगाव तालुक्यातील प्रकार, पुण्यात उघड झाली घटना
चाळीसगाव (प्रतिनिधी) :- लग्नाचे आमिष दाखवून १६ वर्षीय अल्पवयीन युवतीवर नात्यातील तरुणाने अत्याचार केल्याने ती मुलगी गर्भवती राहिली व तिने बाळाला जन्म दिला. याप्रकरणी पीडितेच्या फिर्यादीवरून तरुणावर चाळीसगाव शहर पोलिस स्टेशनला गुन्हा दाखल करण्यात आला आहे.
चाळीसगाव तालुक्यातील एका गावातील १६ वर्षीय अल्पवयीन तरुणी घरात एकटी असताना नात्याने चुलत मामेभाऊ असलेला तरुण तिच्या घरी आला व आपण लग्न करू, असे म्हणून पीडित तरुणीशी बळजबरीने शरीरसंबंध केले. तसेच कोणास काहीही सांगू नकोस, नाही तर मी तुला बघून घेईल, अशी धमकी देऊन आरोपी ऊसतोडीच्या कामावर निघून गेला. मुलीने घाबरून प्रकार कोणाला सांगितला नाही.
काही दिवसांनी तरुणी ऊसतोडणीसाठी परिवारासोबत बाहेरगावी पुण्यात गेल्यावर तिला त्रास जाणवू लागल्याने तपासणी करण्यासाठी दवाखान्यात नेले असता हा प्रकार उघडकीस आला. याप्रकरणी पीडित अल्पवयीन तरुणीच्या फिर्यादीवरून चाळीसगाव शहर पोलिस स्टेशनला गुन्हा दाखल करण्यात आला आहे.
